හෝර්ටන් තැන්න ජාතික වනෝද්‍යානයට පසුගිය දීර්ඝ සති අන්තයේ (ඔක්තෝබර් 4, 5 සහ 6 දිනවල) දේශීය හා විදේශීය සංචාරකයන් 15,965 දෙනෙකුගේ අතිවිශාල ගලා ඒමක් වාර්තා වී තිබේ. මෑත ඉතිහාසයේ දීර්ඝ සති අන්තයකදී වැඩිම සංචාරක පිරිසක් පැමිණි දින කිහිපය මෙය බව වනජීවී සංරක්ෂණ දෙපාර්තමේන්තුවේ ජ්‍යෙෂ්ඨ නිලධාරියෙක් පැවසීය. සැප්තැම්බර් මාසයේ අග සිට හෝර්ටන් තැන්නේ 'නෙළුම් මල්' එකවර පිපීම ආරම්භ වීම මෙම සංචාරකයන්ගේ පැමිණීමට ප්‍රධාන හේතුව බව නිලධාරීහු පෙන්වා දෙති. දින තුනකදී සටහන් වූ සංචාරකයන්ගේ සංඛ්‍යා මෙසේය: * ඔක්තෝබර් 4: 3,858 * ඔක්තෝබර් 5: 5,707 * ඔක්තෝබර් 6: 6,400 සංචාරකයන්ගේ අධික ගලා ඒම හේතුවෙන් ජාතික වනෝද්‍යානයට දරාගත හැකි පිරිස් ධාරිතාව ඉක්මවා ගොස් ඇත. පාලනාධිකාරියට අනුව, එම දින කිහිපය තුළ එක් දිනකදී ත්‍රිරෝද රථ සහ යතුරුපැදි හැර අනෙකුත් වාහන 1,200ක් පමණ උද්‍යානයට ඇතුළු කර තිබේ. එහෙත් එක් දිනකදී වාහන 200කට පමණ උද්‍යානයට ඇතුළු වීමට ඉඩ නොදී ආපසු හරවා යැවීමට පාලනාධිකාරියට සිදුව ඇත. කණගාටුදායක ලෙස, පැමිණි ඇතැම් සංචාරකයන් තම මෝටර් රථ එහි තණ පිටි මත පවා ධාවනය කරමින් නීති විරෝධී ආකාරයෙන් හැසිරී තිබේ. මෙවැනි විනය විරෝධී ක්‍රියාවලට එරෙහිව උද්‍යාන භාරකාරීත්වය නීතිමය ක්‍රියාමාර්ග පවා ගෙන ඇති බව වාර්තා වේ. News2 general ‘තොටළඟ කන්නා’ට ජීවිතාන්තය දක්වා සිර දඬුවම් හෙරොයින් මත්කුඩු ජාවාරමේ නිරත වූ බව කියන “තොටළඟ කන්නා” නමැත්තාට කොළඹ මහාධිකරණය විසින් ඊයේ (ඔක්තෝබර් 11) ජීවිතාන්තය දක්වා සිර දඬුවම් නියම කර තිබේ. දඬුවම නියම කරන මොහොතේදී අධිකරණය මගහැර පලා ගොස් සිටි මෙම ජාවාරම්කරු වහාම අත්අඩංගුවට ගෙන දඬුවම ක්‍රියාත්මක කරන ලෙසට පොලිස්පතිවරයාට සහ අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට නියෝගයක් නිකුත් කිරීම මෙහි ඇති විශේෂත්වයයි. මෙම නඩුව ගොනු කර තිබුණේ 2014 වසරේ දෙසැම්බර් 26 වන දින ඇළකන්ද ප්‍රදේශයේදී කනපති ගනේෂ් හෙවත් “තොටළඟ කන්නා” නමැත්තා සන්තකයේ තිබී හෙරොයින් මත්කුඩු ග්‍රෑම් 39.99ක් සොයා ගැනීම සහ ජාවාරම් කිරීමේ චෝදනා යටතේය. දිගු නඩු විභාගයකින් අනතුරුව කොළඹ මහාධිකරණ විනිසුරු මංජුල තිලකරත්න මහතා තීන්දු කළේ, විත්තිකරුට එරෙහි චෝදනා සාධාරණ සැකයෙන් ඔබ්බට සනාථ වී ඇති බවයි. නඩු විභාගය පැවති කාලය තුළ ඇප මත මුදා හැර සිටි විත්තිකරු අවසානයේදී අධිකරණය මගහැර පලා යාම හේතුවෙන්, ඔහු නොමැතිව නඩු විභාගය පවත්වා තීන්දුව ප්‍රකාශයට පත් කිරීමට සිදුවිය. ඒ අනුව, විනිසුරුවරයා නියෝග කළේ මත්ද්‍රව්‍ය ජාවාරම් සම්බන්ධයෙන් වරදකරු වූ “තොටළඟ කන්නා”ට ජීවිතාන්තය දක්වා සිර දඬුවම් නියම කරන බවත්, දඬුවම වහාම ක්‍රියාත්මක කිරීම සඳහා පලාගිය විත්තිකරු අත්අඩංගුවට ගන්නා ලෙසත්ය. News3 general ලෝයර්ට පහර දුන් කොස්තාපල්ට වැඩ වරදී ගල්කිස්ස මහේස්ත්‍රාත් අධිකරණ භූමිය තුළදී නීතිඥවරයෙකුට පහරදීමේ චෝදනාව මත අත්අඩංගුවට ගත් පොලිස් කොස්තාපල්වරයෙකු ඔක්තෝබර් 13 වැනිදා දක්වා රක්ෂිත බන්ධනාගාරගත කර තිබේ. අධිකරණ භූමියේ නවතා තිබූ බන්ධනාගාර බස් රථයක් පිටතට ගැනීමට නීතිඥවරයාගේ මෝටර් රථය බාධාවක් වීම මෙම සිද්ධියට මුලික හේතුව වී ඇත. බාධාව හේතුවෙන් නීතිඥවරයා සහ පොලිස් නිලධාරියා අතර ඇති වූ බහින් බස්වීම දුරදිග ගොස් පොලිස් කොස්තාපල්වරයා නීතිඥවරයාට පහර දී ඇති බව වාර්තා වේ. පහරකෑමට ලක් වූ නීතිඥවරයා මේ සම්බන්ධයෙන් ගල්කිස්ස පොලිසියට පැමිණිල්ලක් ඉදිරිපත් කර ඇත. පැමිණිල්ල අනුව කටයුතු කළ ගල්කිස්ස පොලිසිය, සිවිල් පුද්ගලයින් කිහිප දෙනෙකුගෙන් ප්‍රකාශ ලබා ගැනීමෙන් අනතුරුව අදාළ පොලිස් කොස්තාපල්වරයා අත්අඩංගුවට ගෙන අධිකරණයට ඉදිරිපත් කිරීමෙන් පසු රිමාන්ඩ් භාරයට පත් කර තිබේ. News4 general භාණ්ඩාගාර බිල්පත් වෙන්දේසියකට සැරසෙයි රුපියල් මිලියන 77,500ක් (රුපියල් බිලියන 77.5ක්) වටිනා භාණ්ඩාගාර බිල්පත් වෙන්දේසියක් ලබන ඔක්තෝබර් මස 15 වනදා පැවැත්වීමට සැලසුම් කර ඇති බව වාර්තා වේ. මෙම වෙන්දේසියේදී දින 91, දින 182 සහ දින 364 යන කාලසීමාවන්ගෙන් කල් පිරෙන භාණ්ඩාගාර බිල්පත් අලෙවි කිරීමට නියමිතය. ඒ අනුව, කල් පිරෙන කාලය අනුව වෙන්දේසි කිරීමට නියමිත භාණ්ඩාගාර බිල්පත්වල වටිනාකම පහත පරිදි වේ: දින 91න් කල් පිරෙන බිල්පත් රුපියල් බිලියන 15 ක් දින 182න් කල් පිරෙන බිල්පත් රුපියල් බිලියන 35 ක් දින 364න් කල් පිරෙන බිල්පත් රුපියල් බිලියන 27.5 ක් මෙම වෙන්දේසිය හරහා රජයේ මුදල් අවශ්‍යතා සපුරා ගැනීමට අපේක්ෂා කෙරේ. News5 general මහනුවර නීතිඥයෙකුගේ කබාය ගලවයි නීතිඥ ආචාර ධර්ම උල්ලංඝනය කිරීමේ චෝදනාවට වරදකරු කෙරුණු මහනුවර ප්‍රදේශයේ නීතිඥවරයෙකුගේ නීතිඥභාවය අහෝසි කිරීමට ශ්‍රේෂ්ඨාධිකරණය ඊයේ (ඔක්තෝබර් 10) තීන්දු කළේය. විශ්‍රාමික මේජර් ඩබ්ලිව්.ඩබ්ලිව්.එස්.එල්.එස්. පලිපාන මහතා විසින් ඉදිරිපත් කරන ලද පැමිණිල්ලක් විභාග කිරීමෙන් අනතුරුව, මහින්ද සමයවර්ධන, ප්‍රියන්ත ප්‍රනාන්දු යන විනිසුරුවරුන්ගේ එකඟත්වය සහිතව ශ්‍රේෂ්ඨාධිකරණ විනිසුරු ශිරාන් ගුණරත්න මහතා විසින් මෙම තීන්දුව ප්‍රකාශයට පත් කරන ලදී. පැමිණිලිකරු සඳහන් කර තිබුණේ, 2006 සහ 2007 වසරවලදී නඩු කටයුත්තක් සඳහා අදාළ නීතිඥවරයා පත් කර ගත් බවත්, ඒ සඳහා ඉල්ලා සිටි රුපියල් ලක්ෂයක මුදලින් රුපියල් 50,000ක අත්තිකාරම් මුදලක් ලබා දුන් බවත්ය. නමුත් පොරොන්දු වූ පරිදි නීතිඥවරයා සිය සේවාව ඉටු නොකළ අතර, ලබා දුන් ලේඛන හා මුදල් ආපසු ලබා දීමටද ඔහු පැහැර හැරියේය. ඒ අනුව, පැමිණිලිකරු 2008 වසරේදී ශ්‍රේෂ්ඨාධිකරණයට මෙම පැමිණිල්ල ඉදිරිපත් කළේය. දීර්ඝ විභාගයකින් පසු තීන්දුව ප්‍රකාශයට පත් කළ ත්‍රිපුද්ගල විනිසුරු මඩුල්ල, වගඋත්තරකරු නීතිඥ ආචාර ධර්ම උල්ලංඝනය කර ඇති බවට තීන්දු කළේය. "මෙම ක්‍රියාව තුළින් වග උත්තරකරු නීතිඥ වෘත්තීයේ ගෞරවයට දැඩි හානියක් සිදු කර තිබේ. ඔහුගේ ක්‍රියා කලාපය කිසිසේත්ම අනුමත කළ නොහැකිය. නීතිය ක්‍රියාත්මක කිරීම යනු පුද්ගලික වාසි තකා සූරාකෑමට ඇති වරප්‍රසාදයක් නොවේ... නීතිඥ වෘත්තිය යනු හුදෙක් වෘත්තියක් නොවේ. එය ගෞරවනීය මහජන විශ්වාසයකි." ඒ අනුව, 1978 අංක 2 දරණ අධිකරණ සංවිධාන පනතේ 42(2) වගන්තියේ නියමයන් අනුව වගඋත්තරකරුගේ නම නීතිඥ නාම ලේඛනයෙන් කපා හරින ලෙස ත්‍රිපුද්ගල විනිසුරු මඩුල්ල විසින් ශ්‍රේෂ්ඨාධිකරණයේ රෙජිස්ට්‍රාර්වරයාට නියෝග කරන ලදී.